Tiranë, 03 Nëntor 2025 – Prokuroria e Posaçme Kundër Krimit të Organizuar dhe Korrupsionit (SPAK) ka vijuar aksionin e saj në Ministrinë e Infrastrukturës dhe institucionet vartëse, duke marrë i pandehur kreun e Autoritetit Rrugor Shqiptar (ARRSH), Gentian Gjyli.
Gjyli u paraqit në SPAK paraditen e sotme, rreth orës 09:00, i shoqëruar nga avokati mbrojtës, i cili konfirmoi komunikimin zyrtar të akuzës.
Akuzat Lidhën Me Tunelin E Llogarasë
Akuza ndaj Gentian Gjylit lidhet me të njëjtin projekt madhor për të cilin u mor e pandehur edhe Zëvendëskryeministrja dhe Ministrja e Infrastrukturës, Belinda Balluku, ditën e premte:
- Akuza: Gjyli akuzohet për “Shkelje e Barazisë së pjesëmarrësve në tenderë apo ankande publike”.
- Projekti: Hetimet lidhen me procedurën e prokurimit për ndërtimin e Tunelit të Llogarasë, pjesë e aksit Orikum-Himarë, me një fond limit prej afro 190 milionë euro pa TVSH.
SPAK ka evidentuar shkelje në zhvillimin e kësaj procedure tenderuese, ku tenderi fillestar i hapur në dhjetor 2020 u anulua dhe u rihap më 22 qershor 2021.
Gjyli, Pasardhës I Berberit Të Arrestuar
Gentian Gjyli mori drejtimin e ARRSH-së në mars të vitit 2024, duke zëvendësuar ish-kreun Evis Berberi, i cili u arrestua pas zbulimit të komunikimeve me vlerë hetimore, që çuan në nisjen e këtij zinxhiri hetimesh. Më parë, Gjyli mbante postin e nëndrejtorit të ARRSH-së.
SPAK thekson se hetimet janë ende në fazë paraprake dhe thirrja e drejtuesve të lartë synon sqarimin e përgjegjësive në këtë proces prokurimi, duke lënë të kuptohet se mund të ketë ende zyrtarë të tjerë nën hetim.
Be First to Comment