KIEV, UKRAINË — Presidenti i Ukrainës, Volodymyr Zelensky, ka deklaruar se nuk ka ndërmend të udhëheqë vendin e tij në kohë paqeje dhe është gati të largohet nga posti pasi lufta të përfundojë. Në një intervistë për “Axios”, ai u zotua se do t’i kërkojë parlamentit që të zhvillojë zgjedhje sapo të arrihet një armëpushim.
“Qëllimi im është të përfundoj luftën, jo të vazhdoj të kandidoj për poste”, tha Zelensky.
Mandati pesëvjeçar i Zelenskyt, i cili u zgjodh me një fitore bindëse në vitin 2019, do të kishte përfunduar në maj të vitit 2024, nëse nuk do të kishte nisur lufta. Kushtetuta e Ukrainës ndalon shprehimisht mbajtjen e zgjedhjeve gjatë një gjendjeje të jashtëzakonshme, siç është ajo aktuale, por Zelensky beson se ky pengesë mund të kapërcehet.
Në takim me ish-presidentin amerikan Donald Trump, Zelensky tha se kishte ofruar të shfrytëzonte periudhën e një armëpushimi për të sinjalizuar parlamentin për zhvillimin e zgjedhjeve. Ai shprehu bindjen se populli ukrainas mund të dëshirojë një “udhëheqës me një mandat të ri” për të marrë vendime jetike drejt arritjes së një paqeje afatgjatë.
Megjithatë, mbajtja e zgjedhjeve mbetet një sfidë e madhe logjistike dhe sigurie. Rreth 20% e territorit të Ukrainës është i pushtuar nga Rusia, dhe miliona ukrainas janë të zhvendosur brenda dhe jashtë vendit. I gjithë territori i vendit mbetet nën kërcënimin e sulmeve ruse, të cilat mund të përdoren për të prishur procesin zgjedhor. “Gjatë armëpushimit, mendoj se siguria mund të na japë mundësinë për të zhvilluar zgjedhjet,” tha Zelensky
Komentet e tij vijnë në një kohë kur, pavarësisht popullaritetit të lartë që gëzoi në fillim të luftës, Zelensky është përballur me kritika për çështje të brendshme, përfshirë një përpjekje të shkurtër për të dobësuar agjencitë anti-korrupsion të vendit, gjë që ngriti shqetësime mbi trajektoren demokratike të Ukrainës.
Be First to Comment