Për PS-në, sidomos për Ramën, Peçi nuk është thjesht një deputet lokal; ai është një njeri kyç që kontrollon një elektorat të qëndrueshëm dhe shumë të rëndësishëm në jug, një zonë që shpesh vendos ekuilibrin zgjedhor. Çdo zhvillim rreth tij është automatikisht edhe një tronditje politike.
Sipas burimeve të Top Channel, hetimi i SPAK lidhet me mënyrën sesi është realizuar privatizimi i ish-Pallatit të Pionierëve në Tepelenë, një proces që është denoncuar nga një prej pronarëve që pretendon shkelje të rënda në procedurat e përdorura.
Peçi është thirrur në cilësinë e deklaruesit, por vetë fakti që procedimi ka avancuar deri në këtë fazë tregon se prokurorët po analizojnë çdo firmë dhe çdo hap të marrë në kohën kur ai mbante postin e kryebashkiakut.
Gjatë dëshmisë në SPAK, deputeti është mbrojtur duke deklaruar se nuk mund të mbajë përgjegjësi për dokumente të vitit 1986, duke lënë të kuptohet se shumë nga aktet që gjenden në dosje janë trashëgime burokratike dhe jo vendimmarrje e tij direkte.
Por megjithatë, kjo nuk e ka penguar Prokurorinë e Posaçme të vazhdojë verifikimet e thelluara për të parë nëse firma e Peçit lidhet me ndonjë favorizim apo shkelje të kryer më vonë gjatë proceseve të privatizimit dhe menaxhimit të pronës.
Kjo nuk është hera e parë që emri i deputetit socialist del në radarët e hetimeve. Opozita prej kohësh ka hedhur akuza në drejtim të tij.
Ish-sekretari i Përgjithshëm i PD-së, Arben Ristani, ka kërkuar jo një herë, por disa herë që SPAK të hetojë procedurat e tenderave të zhvilluara në Bashkinë Tepelenë gjatë kohës që Peçi e drejtonte atë, duke pretenduar se përfituesit ishin zgjedhur në mënyrë preferenciale, me një sistem klientelist që favorizonte kompani të lidhura me pushtetin lokal.
Edhe aktivistja Ardiana Kalaja, e njohur për serinë e gjatë të kallëzimeve që ka bërë në SPAK vitet e fundit, ka depozituar disa denoncime që prekin Peçin, sidomos për abuzime në tre vitet e fundit, duke e kthyer atë në një nga emrat më të përmendur në dosjet e institucionit të drejtësisë së re.
Por ajo që e bën këtë hetim politikisht shpërthyes është pesha që Tërmet Peçi ka brenda Partisë Socialiste. Tepelena ka qenë gjithmonë një nga bastionet më besnike të PS-së, dhe Peçi, si kryebashkiak dhe më pas si deputet, ka qenë për vite njeriu që mban të lidhur strukturën, votën dhe mekanizmin elektoral të zonës.
Për Ramën, ai është një nga komandantët lokalë më të rëndësishëm, një figurë që i garanton qetësi politike dhe mbështetje të fortë në një nga rajonet ku PS-ja rrallë ka luksin të ketë probleme.
Thirrja e tij në SPAK ngre pikëpyetje të mëdha: A do ta mbrojë Rama një figurë kaq të rëndësishme, apo do ta lejojë të konsumoj vetë betejën me drejtësinë?
Historia e deritanishme tregon se kryeministri shpesh i ka lënë të bien njerëzit që nuk i duhen më, por Peçi nuk është një emër që mund të hiqet lehtë nga skema. Ai ka një ndikim real, një rrjet të konsoliduar dhe një aftësi për të lëvizur vota që e bën strategjik për PS-në.
Ndaj, dosja që po shfleton SPAK-u nuk është thjesht një çështje administrative, por një histori me ndikim të thellë politik, e cila mund të testojë marrëdhëniet e Edi Ramës me një prej njerëzve të tij më të besuar në jug dhe të formësojë skenën politike të Tepelenës për vitet që vijnë.
Be First to Comment